Klinika për kirurgjinë e fëmijëve, 133 milionë denarë buxhet për 2017-n

Gjatë vitit 2016, në këtë klinikë janë operuar dhe hospitalizuar 1.870 pacientë. Buxheti i kushtëzuar për Klinikën Universitare për kirurgji të fëmijëve ka për qëllim të stimulojë rritjen e shërbimeve shëndetësore deficitare, të shfrytëzohet për shërbimet e reja shëndetësore dhe për metodat bashkëkohore për mjekim.

 

“Numri i operacioneve nga viti në vit rritet. Vitin e kaluar numri i operacioneve ishte 1870, ku 52 kanë qenë operacione kardiovaskulare. Në klinikë funksionon hapësira për intervenim të shpejtë. Tani para 10 ditësh është bërë dhe transplantimi i veshkës dhe fëmija tani është mirë. Numri i transplantimeve të tilla ka qenë tre me buxhet të kushtëzuar dhe shpresojmë që në të ardhmen të rritet numri i intervenimeve”,- tha një mjeku.

 

“Operacionet të cilat gjatë vitit 2016 janë kryer në këtë klinikë, të gjitha janë kryer me sukses të madh. Njëkohësisht dua të theksoj se buxheti i kësaj klinike për vitin 2016 në krahasim me vitin 2012 është rritur 100%. Në vitin 2012 ka qenë 65 milionë, tani është 133 milionë”,- u shpreh drejtori i FSSh-së, Orhan Ramadani.

 

Rritja e buxhetit të kësaj klinike është bërë pasi është shtuar edhe numri i operacioneve kirurgjikale të fëmijëve dhe transplantimi i veshkave të fëmijëve, shërbime që viteve të fundit kryhen nga mjekët tanë.