Turqi, shqipja - lëndë zgjedhore që nga klasa e 5-të

Derisa në Maqedoni, politika ende diskuton se sa të drejta duhet të ketë gjuha shqipe, Ministria turke e Arsimit Kombëtar ka vendosur në programin arsimor për vitin e ardhshëm gjuhën shqipe si lëndë me zgjedhje, duke nisur që nga klasat e 5-ta.

Të njëjtin status do ta ketë edhe gjuha boshnjake. Programi mësimor i gjuhës shqipe dhe boshnjake, pasi u përgatit dhe u vlerësua edhe me kontributet e Drejtorisë së përgjithshme të arsimit bazë të Ministrisë së Arsimit, u paraqit në Kryesinë e bordit të arsimit dhe edukimit.

Pas procesit të vlerësimit të programit kanë nisur punimet për përgatitjen e teksteve mësimore. Nxënësit që nga viti i ardhshëm mësimor do të mund të mësojnë gjuhët shqipe dhe boshnjake si lëndë zgjedhore.