Gazetarët në MPM vazhdojnë grevën, kërkojnë pagesën e rrogave dhe honorareve

Gazetarë të gazetave “Dnevnik”, “Utrinski vesnik” dhe “Vest”, edhe sot me parulla dhe fishkëllima kërkuan të tërheqin vëmendjen e menaxhmentit të “Medi Print” - Maqedoni, të cilët edhe pas një jave grevë nuk gjejnë kohë as të takohen me të punësuarit, e as t’u paguajnë rrogat dhe honoraret e mbetura.

 

Nga Shoqata e gazetarëve të Maqedonisë kërkuan që menaxhmenti i MPM-së të përmbushë kërkesat e grevistëve dhe të paguajë rrogat e tyre.

 

“Tashmë 7 ditë jemi në grevë dhe nuk kemi asnjë informatë nga menaxhmenti. Është turp që nga gazetarët hulumtues morëm vesh se kush është pronar dhe drejtues i kompanisë. Ka ndryshime në pronësi dhe në drejtim, dhe askush nuk merr mundimin të na tregojë se çfarë po ndodh. Ne mbetemi në kërkesat e njëjta, të na paguhen rrogat dhe honoraret dhe të na tregohet se çfarë planifikohet me redaksitë e “Media print” - Maqedoni”,- tha gazetarja, Tamara Çaushidis.

 

Në “Media Print” - Maqedoni kishte kohë më parë ndryshime të pronarëve. Jordan Kamçev dhe Jana Stanislavjeva u tërhoqën nga MPM dhe i vetmi drejtues i kompanisë tani është Srgjan Kerim.