AFET diskuton për Maqedoninë, arrihet kompromis për 28 nga 318 amendamentet

Komiteti për punë të jashtme të Parlamentit Europian (AFET) sot mban shqyrtimin e dytë të propozim-rezolutës për Maqedoninë. 

Eurodeputetët në grupin AFET arritën kompromis për 28 amendamente shtesë të tekstit të parë të raportuesit, Ivo Vajgëll, si zëvendësim për 318 amendamentet e dorëzuara, dy të tretat e të cilave nga eurodeputetët grekë dhe bullgarë. Eurodeputetët në Komitetin për punë të jashtme do të debatojnë dhe do të përpiqen që për herë të fundit t'i harmonizojnë qëndrimet për rezolutën e Maqedonisë në Parlamentin Europian, ndërsa nesër do të votojnë për të në kuadër të grupit AFET. Më 14 mars në Strasburg, e gjithë përbërja e Europarlamentit do ta miratojë rezolutën në seancë plenare.

Rezolutat e Europarlamentit nuk kanë veprim juridik, por janë vetëm këshilldhënëse dhe mund të merren parasysh nga institucionet e tjera të BE-së dhe nga vendet  anëtare të Bashkimit Europian. Por, marrja parasysh nuk është obligative për asnjë nga institucionet e tjera.