Mediat botërore shkruajnë për vendimin e djeshëm të Ivanovit

Mosdhënia e  mandatit  liderit të LSDM-së, Zoran Zaev, nga ana e presidentit  Ivanov, është tema boshte në të gjitha mediat e rajonit dhe ato ndërkombëtare.

Kryetari i Maqedonisë,  Gjorge Ivanov, refuzoi që t’ia japë mandatin shumicës parlamentare që të formojnë Qeveri.

“Nuk mund t’ia ndajë mandatin dikujt që e kërcënon sovranitetin e shtetit”,- shkruan BBC për vendimin e djeshëm të presidentit Ivanov.  

BBC shkruan gjithashtu se Maqedonia tashmë dy vjet është në krizë politike pas skandalit me përgjimet.

“Zëri i Amerikës” shkruan se “Ivanov refuzon t’ia japë mandatin Zaevit”.

Edhe “Radio Evropa e Lirë” ka nxjerrë tekst me titullin “Ivanovi ende nuk e mandaton Zaevin, rriten tensionet”.

Në tekstin e publikuar nga “Dojçe Vele” shkruan “Reagime të ashpra për vendimin e Ivanovit ndaj Zaevit”.

Vendimi i djeshëm i kreut të shtetit,  Gjorge Ivanov, ishte top temë edhe në mediat e shkruara dhe ato elektronike të  rajonit.

“Ivanov refuzon Zaevin: pengesë Platforma Shqiptare”, shkruan “Top-Channel” i Shqipërisë.

“Nova Tv” e Bullgarisë thekson se “Gjorge Ivanov akuzoi Shqipërinë për ndërhyrje në punët e brendshme të vendit të tij”.

“Shkupi pa mandatar, pret nga bota “dënimin e Platformës Shqiptare për qeverisje”, shkruan e përditshmja kosovare  “Koha.ditore”.

“Kuriri” i Serbisë, duke cituar komisionerin Hahn, shkruan: “Dramatike, grusht-shtet në Maqedoni për të gjithë, dhe presidenti duhet ta respektojë rezultatin e zgjedhjeve”.

Për vendimin kontestues të Ivanovit për mosdhënie të mandatit kanë reaguar dhe një sërë politikanësh, parti dhe zyrtarë të Maqedonisë, rajonit, por edhe të BE-së.