VMRO, jo Platformës Shqiptare, Ahmeti: Deklarata u përpilua në Shkup

VMRO-DPMNE-ja ka premtuar se do ta mbështesë qeverinë e LSDM-së dhe do ta bëjnë Zaevin kryeministër, nëse ky i fundit heq tërësisht dorë nga Platforma shqiptare.

Sipas VMRO-DPMNE-së, realizimi i platformës nga Tirana do të thotë ridefinim i plotë i Republikës së Maqedonisë, shndërrimi i saj nga shteti multietnik në binacional, i cili në fazat e vona do të federalizohet, kantonizohet dhe ndahet.

"VMRO-DPMNE-ja nuk do të lejojë realizim të skenarit të tillë, i cili është në kundërshtim me interesat shtetërore dhe nacionale, dhe do të qëndrojë në anën e popullit, i cili në zgjedhje nuk votoi për platformën nga Tirana”,- thuhet në kumtesën e VMRO-DPMNE-së, që thotë se do të mbrojë vullnetin e shumicës së votuesve që i dhanë besimin Koalicionit “Për Maqedoni për të mirë”.

Por, lideri i BDI-së, Ahmeti, ripërsërit se deklarata e partive shqiptare në asnjë mënyrë apo formë nuk cenon shtetin, karakterin unitar e as që bën fjalë për federalizim apo ndarje.

“Deklarata e përbashkët e partive parlamentare shqiptare të Maqedonisë është dakorduar dhe shkruar në Shkup, dhe për bazë ka programet zgjedhore të të gjithë garuesve shqiptarë në zgjedhjet e 11 dhjetorit. Kjo deklaratë në asnjë mënyrë apo formë nuk e cenon shtetin, karakterin unitar, e as që bën fjalë për federalizim apo ndarje”,- ka theksuar Ahmeti.

Ai  fton partitë shqiptarëve të përmbahen e të mos lejojnë që kriza sistemore dhe brendaetnike të kthehet në një përplasje ndëretnike.

Ai fton edhe partitë politike maqedonase që të përmbahen nga shprehja e pakënaqësisë  dhe përfshirja në këtë pakënaqësi të elementit ndëretnik për shkak të  ndjeshmërisë së shoqërisë.

Ahmeti  fton edhe qytetarët të ruajnë gjakftohtësinë dhe të mos lejojnë të bien pre e skenareve dashakeqe, që kanë origjinë në adresa të dyshimta.