Sulmi në Gjermani, autori është shqiptar, kishte probleme psikike
Sulmuesi që qëlloi me sëpatë nëntë persona në stacionin kryesor të trenit, në qytetin gjerman të Dyseldorfit, të enjten në mbrëmje, vuante nga probleme psikologjike, ka konfirmuar policia...
I dyshuari është një 36 vjeçar nga Kosova, i cili jeton në qytetin perëndimor gjerman, Vuppertal, i cili pasi plagosi nëntë persona, pesë prej të cilëve në gjendje më të rëndë, u largua menjëherë nga vendi i ngjarjes, por u hodh nga një urë aty pranë, duke u vetëplagosur. Ai është arrestuar dhe ndodhet në spital. Policia tha se besonte se ai ka vepruar i vetëm.
Për fat të mirë, asnjë prej të plagosurve nuk janë në rrezik për jetën dhe ndodhen në gjendje të qëndrueshme shëndetësore. Një zëdhënës i policisë tha të enjten vonë se policia nuk e konsideron sulmin si akt terrorist, por si një “tërbim”.