Kthehet frika në Francë, sulm në një shkollë, tetë të plagosur

Tetë persona janë plagosur nga të shtënat me armë në një shkollë në qytetin Grasse, në jug të Francës, bën të ditur Ministria e Brendshme. Edhe pse paraprakisht autoritetet aktivizuan aplikacionin telefonik paralajmërues për sulme terroriste, më pas konfirmuan se ngjarja nuk ka të bëjë me terrorizmin.

 

Një adoleshent 17-vjeçar, i cili mbante një pushkë, dy armë dhe dy granata, është arrestuar menjëherë pas incidentit, studenti i dytë është në kërkim. 

 

Një tjetër incident ka tronditur Parisin. Një bombë në letër ka shpërthyer në zyrën e Fondit Monetar Ndërkombëtar, duke plagosur në duar dhe fytyrë punonjësin që e ka hapur atë. Stafi i Zyrës franceze të FMN-së është evakuuar menjëherë.

 

Drejtorja e FMN-së, Christine Lagarde, e dënoi atë që e cilësoi një akt frikacak të dhunës kundër stafit të FMN-së. Letra bombë vjen pas një tjetër pakoje me eksploziv që dje iu dërgua ministrit gjerman të Financave, Volfgang Schaeuble.

 

Grupi grek i ekstremit të majtë “Komploti i qelizave të zjarrit” tha se ai e ka dërguar pajisjen në Gjermani, por ende nuk ka një konfirmim zyrtar nëse dërgesat shpërthyese në Gjermani dhe Francë kanë lidhje me njëra-tjetrën. Franca vijon të jetë në gjendje emergjence pas sulmit vdekjeprurës të 18 muajve më parë.