Oda Stomatologjike e Maqedonisë: Më shumë kontrolle parandaluese te dentisti

Kështu bëjnë të ditur nga Oda Stomatologjike e Maqedonisë në Ditën Botërore të Shëndetit Oral. Ata apelojnë për vetëdijesimin e popullatës  për mbrojtjen e  dhëmbëve, e sidomos  prindërit për edukimin e fëmijëve që në çerdhe, pasi shprehitë  krijohen që në moshë të re.

 

“Maqedonia është një nga vendet ku përqindja e kariesit është dukshëm më e lartë dhe mendoj se më shumë duhet të punojmë rreth kësaj çështje, për vetëdijesimin e njerëzve që në të ardhmen  sa më shpesh të bëjnë kontrolle të dhëmbëve te stomatologu. Ne vazhdimisht punojmë në parandalimin dhe kemi aktivitete të tilla, mirëpo ende nuk e dimë se përse njerëzit nuk e vizitojnë më shpesh stomatologun”,- deklaroi nënkryetarja e Odës Stomatologjike të Maqedonisë, Marija Andonovska.

 

Qytetarët thonë se mundohen të mbajnë higjienën orale, ndërsa pranojnë se stomatologun më shumë e vizitojnë në rast nevoje. 

 

“Jo, nuk i pastroj rregullisht dhëmbët, por në të ardhmen do të përpiqem”,- theksoi një qytetar.  

 

“Nuk shkoj rregullisht në stomatolog, vetëm kur kam nevojë, mirëpo dy herë në ditë i laj dhëmbët”,- u shpreh një qytetare. 

 

“Unë dy herë në muaj e vizitoj stomatologun, pasi që e kam patjetër shkaku i protezave”,- tha një qytetar. 

 

Me rastin e Ditës Botërore të Shëndetit Oral, ekipe të stomatologëve në tre lokacione të kryeqendrës u dhanë këshilla qytetarëve për shëndetin e tyre oral.