“Lagja e Trimave”, seanca për Sulejman Osmanin, Prokuroria prezantoi provat materiale

Prokuroria Publike në seancën gjyqësore për rastin “Kumanova” ka prezantuar dëshmitë materiale para të akuzuarit, Sulejman Osmani, i njohur në opinion si Komandant Sula.

 

Edhe Osmani është i ngarkuar me veprën terrorizëm për ngjarjet që ndodhën në “Lagjen e Trimave” në Kumanovë. Prokurori, Naum Panovski, ka prezantuar material me foto dokumentacion, video dhe raporte nga MPB.

 

Në dëshmitë  e prezantuara nga ana e Prokurorisë, i akuzuari shihet se si e tregon vendin e armëve që grupi kishte fshehur afër fshatit Malinë.

 

Këto materiale janë nga dita e 10 marsit 2015 dhe të njëjtët janë prezantuar edhe para grupit, i cili akuzohet për terrorizëm dhe organizim terrorist në ngjarjen kritike të 9-10 majit në Kumanovë.

 

Avokati, Naser Raufi, thotë se gjykimi i Osmanit bëhet ndaras nga 37 të akuzuarit e tjerë pasi që nisi më vonë dhe Gjykata nuk pranoi për ta bashkuar lëndën, sepse do të duhej të kishte rigjykim nga fillimi.

 

“Rasti i Sulejman Osmanit nuk u bashkëngjit me lëndën e grupit që gjykohet dhe me seancë ne jemi më mbrapa me lëndën e Sulejman Osmanit. Jemi thuajse te fillimi i procesit, ende jemi te obduksionet, ku u lexuan provat me shkrim. E pamë edhe një videoxhirim për armët ku i ka detektuar i akuzuari, Sulejman Osmani, në malin e Malinës, por shumica e provave ishin me lexim të provave nga ana e Prokurorisë”,- theksoi avokati mbrojtës, Naser Raufi.

 

Osmani u bë i njohur për opinionin publik pas dorëzimit të të mbijetuarve të konfliktit, ku ai në mënyrë misterioze, me pranga në duar, arriti t’i ikë policisë.

 

Ai i ka ikur policisë në momentin kur i ka treguar armët në Gushicë, por pas një fletarresti ndërkombëtar të lëshuar nga Maqedonia, ai më 22 qershor të vitit të kaluar u ekstradua nga Kosova në Maqedoni. 

 

Seanca e radhës për rastin “Lagja e trimave” duhet të mbahet më 29 mars, ndërsa ajo për Sulejman Osmanin më 30 mars.