Të drejtat e shqiptarëve në Maqedoni, Rama: Nuk janë favore, të drejtat u takojnë

“Nuk mund të fajësosh fqinjët pse gjërat nuk shkojnë si duhet në shtëpinë tënde”. Kështu ka deklaruar kryeministri i Shqipërisë, Edi Rama, në një intervistë për “dialog-plus ch”.

Duke iu referuar situatës në Maqedoni, kryeministri shqiptar u shpreh se vendi gjendet në një krizë kushtetuese që iu faturohet padrejtësisht shqiptarëve, i faturohet komplet padrejtësisht Tiranës.

“Përgjegjësinë kryesore për shtëpinë e kanë të zotët e shtëpisë, nuk e kanë fqinjët. Kjo është një lojë politike. Dhe këtë e dinë shumë mirë ata që e luajnë, sepse shqiptarët s’kanë qenë, s’janë dhe as që do të jenë problemi i Maqedonisë, por shqiptarët kanë qenë, janë dhe do të jenë njësi shtetformuese, të drejtat e së cilës nuk mund të trajtohen si favore. Kaq. Por, e gjitha është një lojë politike, që nuk ka të bëjë fare me të ashtuquajturën “Platformën e Tiranës”. Platforma është shkruar dhe është aprovuar nga partitë shqiptare. Unë kam pasur kënaqësinë dhe detyrën që t’i ndihmoj, jo për platformën, por t’i ndihmoj për komunikimin mes tyre”,- shton Rama.

Sipas tij, “temperatura politike” në Ballkan ka shënuar rritje në mënyrë të rëndësishme, por  tensionet janë rezultat i klimës elektorale në rajon. Serbia gjendet para zgjedhjeve presidenciale .

Kosova është në një situatë të ndërlikuar, sepse s’po arrin dot heqjen e vizave, ndërkohë që Bashkimi Europian ka vënë një kusht që duhet zgjidhur: demarkacionin me  Malin e Zi.

Bosnja ka ato probleme që ka. Mali i Zi kaloi një palë zgjedhje shumë dramatike dhe faktikisht koalicioni pro-NATO mbijetoi me vetëm pak vota në parlament. I pyetur nëse kufijtë ballkanikë janë të sigurtë, Rama dha përgjigje: “Ballkani nuk do të merret me kufijtë e vet deri kur do të besojë tek Europa dhe deri kur Europa do të vazhdojë të motivojë Ballkanin si një horizont të patjetërsueshëm.

Fati i stabilitetit në Ballkan dhe i vetë njerëzve të gjeneratës tjetër në Ballkan është i lidhur ngushtësisht me fatin e Europës. Nëse mbyllet perspektiva europiane, nëse dështon anëtarësimi në BE, atëherë në Ballkan hapet debati për kufijtë”.

Kryeministri shqiptar përkujton se Rusia ka një qasje strategjike ndaj Ballkanit, ndërkohë që Europës i mungon kjo qasje. Europa po i trajton vendet e Ballkanit si të ishte në kohët e veta më të mira, ndërkohë që është në kohët e veta më të këqija. Mbetet për të shpresuar se prania e ShBA-së në rajon do të vazhdojë të jetë e madhe dhe qasja strategjike nuk do të ndryshojë. Në këtë periudhë kalimtare të administratës krijohet një lloj ndjesie boshllëku, por jam i bindur se është i përkohshëm, thotë kryeministri Rama në intervistën për “dialog-plus ch”.