Sulmi Aemrikan në Siri, reagon Asad dhe Putin, e quajnë sulmin agresion

 

Presidenti amerikan Donald Trump i bëri thirrje të gjithë kombeve të civilizuara t’i bashkohen Amerikës, për t’i dhënë fund masakrave dhe gjakderdhjes në Siri e për të goditur gjithashtu terrorizmin e çfarëdo lloji. 

 

“Të martën, Bashar al Assad ndërmori një sulm të tmerrshëm kimik kundër civilëve të pafajshëm, duke përdorur një agjent nervor vdekjeprurës. Assadi mbyti jetët e burrave, grave dhe fëmijëve të pambrojtur. Për shumë prej tyre ishte një vdekje e ngadaltë dhe brutale. Asnjë fëmijë i Zotit nuk duhet të vuajë një llahtar të tillë. Unë urdhërova një sulm ushtarak ndaj bazës ku u organizua kjo goditje. Ky ishte një veprim në mbrojtje të interesave jetike të sigurisë kombëtare të Shteteve të Bashkuara për të parandaluar përhapjen dhe përdorimin e mëtejshëm të armëve kimike vdekjeprurëse. Nuk ka asnjë diskutim që Siria përdori armë të ndaluara të këtij lloji, duke shkelur kështu detyrimet e saj që burojnë prej Konventës së Armëve Kimike e duke injoruar Këshillin e Sigurimit të OKB-së”, tha Donald Trump, president i shba-ve.

 

Qeveria siriane ka reaguar ashpër, duke e cilësuar sulmin si një agresion.  Ministri i Jashtëm sirian, Ëalid al-Moallem, e mohon përdorimin e armëve kimike

 

“E theksoj edhe një herë se ushtria jonë siriano-arabe nuk ka përdorur dhe nuk do të përdorë asnjëherë armë kimike ndaj popullit të thjeshtë, e nuk ka për t’i përdorur as mbi terroristët”, tha Valid Al-Moallem, ministër i jashtëm i Sirisë.

 

Me të njëjtat tone ka reaguar edhe Moska zyrtare. Presidenti Vladimir Putin I quajti sulmet e SHBA-së ndaj Sirisë si  agresion ndaj një kombi Sovran. Putin beson se sulmet dhunojnë ligjet ndërkombëtare dhe po kryhen me një pretekst i shpikur dhe këmbëngul se ushtria siriane nuk ka armë kimike.

 

Rusia bën thirrje për një tjetër  takim të Këshillit të Sigurimit të OKB-së. Pentagoni sqaroi se ushtria ruse, e cila mbështet qeverinë siriane, ishte njoftuar që më parë për sulmin me raketa, Ky është sulmi i parë direkt i Amerikës ndaj qeverisë siriane në luftën gjashtëvjeçare civile dhe është urdhri i parë më i rëndësishëm ushtarak i Donald Trumpit, që prej se është zgjedhur President. Për momentin, nuk dihet ende nëse ky ishte vetëm një akt hakmarrjeje apo një hap që shënon fillimin e një fushate më të gjatë kundër Asadit.