Kriza politike, Feroxhi: BE e interesuar që kriza të zgjidhet shpejt

Drejtori i Institutit italian për marrëdhënie ndërkombëtare, ambasadori Ferdinando Neli Feroxhi, thotë se zgjidhja e krizës politike në Maqedoni është me rëndësi me qëllim që vendi të mund të vazhdojë me procesin reformues, i cili është kusht kyç për progres të mëtutjeshëm të rrugës drejt eurointegrimit.

 

Ai madje shprehet i bindur se Maqedonia do të gjejë zgjidhje të bazuar në Kushtetutë dhe në parimet e demokracisë funksionale. 

 

“U mbetet partive politike para së gjithash, edhe forcave politike në Maqedoni të gjejnë zgjidhje për krizën politike. BE është e interesuar për zgjidhje sa më të shpejtë të krizës”, tha Ferdinando Neli Feroxhi, drejtor i institutit italian për marrëdhënie ndërkombëtare

 

I pyetur për euroskepticizmin në rritje në vendet e rajonit të Ballkanit Perëndimor dhe veçanërisht në Maqedoni, Feroxhi thotë se është i vetëdijshëm për frustracionin në rritje për shkak të mangësisë prej progresit në procesin e qasjes, por është i bindur se Unioni do të ketë mundësi që së shpejti ta ndryshojë situatën.