Kërçovë: Vazhdojnë investimet në infrastrukturë

Me një investim prej 300 mijë eurosh, do të hapet edhe një korsi tjetër nën urën e rrugës së Reshtanit, e cila do ti evitojë pengesat e deritanishme të qarkullimit rrugor.

 

Aksi rrugor në drejtim të lagjes së Reshtanit, që kalon nën urën e rrugës magjistrale, ka shkaktuar probleme të shumta jo vetëm për qarkullimin e makinave, por edhe për lëvizjen e këmbësorëve.  Këto vështirësi, do të tejkalohen me projektin për hapjen e një korsie tjetër rrugore, nën urën mbi të cilën kalon magjistralja, ku do të ndërtohen edhe trotuaret që do të lehtësojnë edhe lëvizjen e banorëve të lagjes së Reshtanit.

 

Kryetari i komunës së Kërçovës Fatmir Dehari, potencoi se ky projekt do të fillojë me dislokimin e lumit intervenimet teknike në gypin kryesor të ujësjellësit, i cili kalon pikërisht në vendin ku do të hapet korsia tjetër e rrugës.

 

Punët ndërtimore i zhvillon NP “Komunalec” dhe sipas planifikimit ky projekt që kap shumën e rreth 300 mijë euro, do të përfundojë brenda tre muajve.