PPS, më pak se tre muaj për të ngritur akuza, Maksuti: Të shtyhet afati, PPS pati obstruksione

Gjykata Supreme do të vazhdojë me debatin nëse kryeprokurori shtetëror, Marko Zvërlevski, do të mundet të dorëzojë kërkesë për mbrojtjen e ligjshmërisë së PPS-së dhe për lëndët e saj si dhe për çështjen nëse duhet të ndalohet shfrytëzimi i materialeve nga përgjimi i paligjshëm apo të ashtuquajturat “bomba”, si dëshmi në procedurë penale.

Profesori universitar, Mersin Maksuti, thotë se zbardhja e megaskandalit me përgjimet e paligjshme nuk duhet të ndërpritet vetëm për shkak të afatit 18 mujor, i cili u dëshmua si i pamjaftueshëm. Sipas tij, ky afat duhet të shtyhet.

“Afati 18 mujor i Prokurorisë Speciale për të iniciuar procedurat ndaj kryerësve të dyshuar të veprave penale, tashmë po shihet qartë se është i pamjaftueshëm dhe patjetër kjo duhet të shtyhet me një intervenim në Ligjin e PS-së”,- u shpreh profesori universitar, Mersim Maksuti.

Prokuroria Speciale deri tani ka hasur në obstruksione nga të gjitha organet relevante që duhej bashkëpunim me ta, konstaton Maksuti. Sipas tij, materialet nga përgjimet e paligjshme, pa mëdyshje, paraqesin një bazë të mirë për ngritjen dhe procesuimin e rasteve.

“Ato, tashmë, janë të rregulluara edhe në aspektin juridik, d.m.th. janë të paraparë në vetë Ligjin për themelimin e PPS-së, ligj i cili mbështet kryesisht në “bombat””,- theksoi profesori universitar, Mersim Maksuti.

Qershori është afati i fundit ku prokurorja publike speciale, Katica Janeva, mund të ngre aktakuza për vepra penale që burojnë përgjimet e paligjshme. Neni 22 i Ligjit për Prokurorinë Publike për Ndjekjen e Veprave Penale të Lidhura që dhe që Burojnë nga Përmbajtja e Ndjekjes së Paligjshme të Komunikimeve, thotë: ”Prokurori publik, i cili udhëheq me Prokurorinë Publike, mund të ngre padi ose të urdhërojë ndërprerje të procedurës hetimore në periudhë jo më gjatë se 18 muaj nga dita e marrjes së lëndëve dhe materialeve në kompetencë të saj”.

Pak ditë më parë, PPS njoftoi se është e vetëdijshme për urgjencën e procedurave dhe se ato nuk stërzgjaten nga ajo, prandaj bëri thirrje për zbatimin e parimit të urgjencës gjatë procedimit të kërkesave të PPS-së. (Shpëtim Nuredini, TVM2)