Referendumi presidencial në Turqi, opozita kërkon rinumërim të votave

Partia kryesore e opozitës në Turqi kërkon rinumërim të votave, pas rezultatit të ngushtë të referendumit të së dielës, që i jep presidentit, Recep Tayyip Erdogan, fuqinë ta zgjerojë ndjeshëm pushtetin e tij.

 

Partia Popullore Republikane (CHP) ka ngritur pretendimin se procesi zgjedhor pati parregullsi të mëdha. Përpjekja e Erdoganit për presidencë ekzekutive arriti të triumfojë me vetëm pak më shumë se 51% të votave.

 

 

Edhe për OSBE-ODIHR-in dhe organizatat tjera vëzhguese ndërkombëtare referendumi në Turqi ishte jashtë standardeve ndërkombëtare. OSBE publikoi raportin paraprak ku numëron parregullsitë e shumta, që sipas saj, e bëjnë të pavlefshëm procesin.

 

"Dy palët në fushatë nuk kanë pasur mundësi të barabarta për prezantim para mbajtjes së referendumit. Ndryshimet e fundit në procedurën për rinumërim të fletëvotimeve ka kontribuuar për prishjen e mbrojtjes së rëndësishme për procesin zgjedhor",- tha Cezar Florin nga OSBE-ODIHR.

 

 

Vetë Erdogan e ka quajtur referendumin si historik edhe pse tre qytetet më të mëdha të vendit, Stambolli, Ankaraja dhe Izmiri u thanë “jo” ndryshimeve kushtetuese. 

 

“Turqia mori një vendim historik mbi një diskutim 200-vjeçar të lidhur me sistemin e saj kushtetues. Ky vendim nuk është diçka i zakonshëm. Kjo është dita kur është hedhur një hap shumë i rëndësishëm në raport me Kushtetutën”,- theksoi presidenti i Turqisë, Rexhep Tayip Erdogan.    

                                   

Fitorja e tij u prit në të gjithë Turqinë, sa me festime, aq edhe me protesta. Mbështetësit e opozitës dolën menjëherë nëpër rrugët e Stambollit, duke përplasur tenxhere e tiganë, një formë tradicionale proteste kjo, ndërsa demonstrata të tilla të zhurmshme pati edhe në zona të tjera.

 

 

Në pritje të raportit, zyrtarët e lartë të Brukselit, presidenti i Komisionit Europian, Zhan Klod Junker, komisioneri për zgjerimin dhe fqinjësinë, Johanes Han, dhe shefja e Diplomacisë evropiane, Federika Mogerini, kërkuan nga Qeveria turke që të krijojë një konsensus kombëtar për ndryshimet kushtetuese, sepse rezultati i zgjedhjeve ka qenë shumë i ngushtë. Në të njëjtën vijë është edhe Gjermania. Ministri i Jashtëm, Sigmar Gabriel, deklaroi në Tiranë se Erdogani nuk e siguroi shumicën e nevojshme të votave brenda Turqisë.

 

“Në një rezultat të tillë kaq të ngushtë, duke u nisur edhe prej faktit që votimet u zhvilluan në një situatë të jashtëzakonshme dhe shumë njerëz në muajt e fundit kanë pasur përshtypjen se liritë themelore në Turqi kanë qenë tejet të kufizuara, është mjaft e rëndësishme të pritet gjykimi dhe vlerësimi i monitoruesve ndërkombëtarë”,- u shpreh ministri i Punëve të Jashtme i Gjermanisë, Sigmar Gabriel.