Nuhiu kërkon dorëheqjen e Çavkovit, grup pune për zbardhjen e ngjarjeve në Kuvend

Për rikthimin e besimit tek qytetarët pas ngjarjeve në Kuvend të enjten e kaluar, Nuhiu ka vendosur të pastrojë radhët e MPB-së pikërisht nga ata që penguan intervenimin në kohë të policisë më 27 prill.

 

“Kthim prapa nuk ka! Gjërat duhet zbardhur deri në fund dhe secili do të përgjigjet për veprimet e veta! Në Qeveri kam parashtruar kërkesë për shkarkimin e Mitko Çavkov nga funksioni i drejtorit të Byrosë për Siguri Publike. Kam emëruar koordinator të Shtabit Operativ z. Goran Savovskin, këshilltar shtetëror në Byronë për Siguri Publike”,- deklaroi ministri i Punëve të Brendshme, Agim Nuhiu.

 

Nuhiu ka formuar tashmë grupin e punës që do të hetojë punën e strukturave gjatë ditës së dhunës në Kuvend, e më pas do të dorëzojë një raport të hollësishëm për të vërtetuar përgjegjësitë individuale. 

 

“Kam formuar një grup punues të përbërë nga profesionistë në MPB, i cili ka për detyrë ta vërtetojë a kanë vepruar në pajtim me procedurat e përcaktuara Shtabi Operativ dhe njësitë organizative në MPB, a janë bërë lëshime gjatë punës, tejkalime të kompetencave ose moskryerja e detyrave dhe obligimeve?”,- tha ministri i Punëve të Brendshme, Agim Nuhiu.

 

Nuhiu fton të punësuarit në Ministrinë e Brendshme që të kryejnë profesionalisht detyrat e tyre dhe nëse kanë çfarëdolloj materiali që do të ndihmonte hetimin e përgjegjësisë së individëve të caktuar, t’ia dorëzojnë anëtarëve të grupit të brendshëm hetimor.