Takohen Rama e Basha, nuk ka marrëveshje mes palëve

Takimi me dyer të mbyllura dhe larg medias mes dy liderëve të politikës shqiptare, kryeministrit, Edi Rama, dhe kreut të opozitës, Lulzim Basha, në tryezën e përbashkët, thirrur nga presidenti i Republikës, zgjati mbi tre orë.

 

Në fund të tij, nga presidenca nuk doli as tym i bardhë e as i zi. Marrëveshje pra nuk ka. Për këtë takim u lejua vetëm një mundësi e shkurtër për foto dhe pamje filmike, dhe gjatë kësaj kohe nuk pati asnjë shtrëngim duarsh, madje Rama e Basha kanë shmangur përgjatë kohës së filmimeve çdo shikim mes njëri-tjetrit. 

 

Por, buzëqeshjet e shkëmbyera me presidentin e Republikës nuk kanë munguar dhe kreu i shtetit edhe përgjatë këtyre minutave ka luajtur rolin e negociatorit, duke biseduar herë me njërin e herë me tjetrin. 

 

I pari që ka lënë zyrën e presidentit Nishani ka qenë kryeministri, Edi Rama, i cili ka kaluar në këmbë pranë çadrës së opozitës, duke i përshëndetur protestuesit, gjë që ka nxitur reagimin e tyre. Lulzim Basha është larguar nga Presidenca rreth 50 minuta më pas, për të zhvilluar menjëherë një takim me aleatët.