Kushtetuesja hedh poshtë iniciativat për PL, debllokomi i komunave në duart e Parlamentit

Gjykata Kushtetuese  vendosi që të mos ngrit procedurë për dy iniciativat me të cilat kërkohej zhbllokimi i punës së krerëve të Komunave të Maqedonisë.

 

“Gjykata Kushtetuese nuk mundet që të krijojë situatë juridike, kur atë nuk e ka bërë legjislativi. Me këtë, mandati i krerëve të komunave dhe këshilltarëve komunal skadon më 15 maj” , ka njoftuar Gjykata Kushtetuese. 

 

Pas këtij vendimi të kushtetueses Bashkësia e Njësive të Vetëqeverisjes Lokale kërkon nga parlamenti për vazhdimin e mandatit të kryetarëve të komunave në të kundërtën sipas tyre do të  paralizohej tërësisht veprimi i komunave të Maqedonisë.

 

“Ne respektojmë çdo vendim të organeve të drejtësisë. Tani  Bashkësia e Vetëqeverisjes Lokale dhe Ministria e Vetëqeverisjes Lokale t’i drejtohen Kuvendit, gjegjësisht kryetarit të Parlamentit dhe kryetari i Parlamentit do të veprojë konform ligjit që të mos bllokohen puna e komunat dhe me këtë të mos dëmtohen qytetarët në të gjitha komunat në nivelin nacional”,- u shpreh kryetari i BNJVL-së, Nevzat Bejta.

 

Deri te Gjykata Kushtetuese Iniciativa për vazhdimin e mandatit të kryetarëve të komunave dhe këshilltarëve dorëzuan Ministria e Vetëqeverisjes Lokale, Ministria e Drejtësisë dhe Kongresi Botëror Maqedonas.

 

Zgjedhjet lokale duhej të mbaheshin në gjysmën e parë të majit, por për shkak të asaj që nuk u zgjodh kryetari i Kuvendit, skaduan afatet për shpalljen e tyre në kohën e paraparë. 

Mandati i kryetarëve të komunave dhe këshillave komunal skadon më 15 maj.