“Erazmus plus”, mundësi për 600 studentë, praktikë në universitetet e njohura europiane

1 milion e 600 mijë euro do të ndahen përmes programit “Erazmus plus” për rreth 600 studentë të vendit që do të shkojnë për shkëmbim të praktikës në universitet e njohura europiane.

 

Autoritetet janë të kënaqur nga shfrytëzimi i këtyre mjeteve dhe konsiderojnë se ky program mundëson zhvillim më të madh profesional të studentëve të vendit njësoj si kolegët e tyre në Europë. Ata nuk kanë dyshim se ky program do t’ua hap dyert studentëve në të ardhmen.

 

“Këtë vit agjencia kombëtare do të shpërndajë 1 milion e 600 mijë euro për 19 institucione të larta arsimore, përmes të cilave do të mbështesin  596 studentë ”,- theksoi Darko Dimitrov nga  AKPEAM.

 

“Është konfirmuar fakti se ekziston një interesim i madh në mesin e subjekteve përfituese dhe po ashtu është konfirmuar se ekziston një kualitet i lartë i aplikimeve”,- u shpreh zëvendëskryeministri për çështje europiane, Arbër Ademi.

 

“Maqedonia rangohet mirë në lidhje me shfrytëzimin e mjeteve të programit “Erazmus”. Mijëra studentë veç më kanë shfrytëzuar këto beneficione dhe ky është një mesazh i fuqishëm që dërgon Maqedonia në BE për përcaktimin e saj për në Unionin Europian”,- theksoi Mauro Di Veroli nga BE.

 

Buxheti i programit europian “Erazmus Plus” për këtë vit peshon 6.25 milion euro, më i madhi deri tani. Këto mjete këtë vit janë paraparë të shpërndahen përmes tre thirrjeve publike. Deri tani Maqedonia ka arritur të shfrytëzojë gjithsej 12 milion euro përmes këtij programi.