Francë, Macron bëri betimin si president

Presidenti Emmanuel Macron është betuar këtë të dielë në pallatin “Elysee mes masave tejet të përforcuara të sigurisë anembanë Parisit.

Kandidati i pavarur Macron fitoi bindshëm në balotazhin e fundjavës së kaluar, përballë rivales së tij nga ekstremi i djathtë, Marine Le Pen.

Gjate fjalimit, Presidenti Macron tha se do të rivendosë pozitat globale të Francës. Sipas tij Franca do të jetë e fuqishme vetëm nëse është e suksesshme dhe e begatë.

“Francezët kanë zgjedhur më 7 maj, shpresën. Ne duhet t’u kthejmë francezëve shijen për të ardhmen dhe krenarinë për atë që francezët janë. E gjithë bota do t’i kushtojë vëmendje asaj që mendon e thotë Franca, sepse ne të gjithë së bashku do të shkojmë përtej frikës dhe ankthit. Së bashku do të jemi shembull i një populli që di të afirmojë vlerat dhe parimet e tyre, ato të demokracisë dhe republikës” – u shpreh presidenti i ri i Francës, Emanuel Makron.

Ai ka premtuar se do të “punojë për të gjithë” dhe thotë se programi i tij do të shërbejë për të majtë e të djathtë.  Java e parë e Macronit në detyrë do të jetë e ngarkuar.

Ai do të niset për në Berlin të hënën për t’u takuar me Kancelaren Angela Merkel, si dhe për të treguar angazhimin e tij ndaj Bashkimit Europian.

Ai pritet gjithashtu të emërojë një kryeministër të vendit.  Macron përballet me disa sfida të rëndësishme, përfshi papunësinë e lartë veçanërisht mes të rinjve në Francë, si dhe rritjen ekonomike tejet të ulët.

Synimet e tij janë të forcojë investimet dhe të krijojë një model të ri rritjeje ekonomike, që do të rrisë mirëqenien dhe mbrojë mjedisin. (Besim Abdullahu, TVM2)