"Parakalimi i maturantëve 2017", maturantët dhanë betimin: I themi jo dhunës

Rreth 1000 maturantë nga 16 shkolla të mesme të Shkupit dhe shumë moshatarë të tyre nga Struga, Ohri, Strumica e Gjevgjelia vallëzuan kadrilin në Manifestimin tradicional "Parakalimi i maturantëve 2017" në sheshin "Maqedonia". Maturantët dhanë betimin e tyre se kurrë nuk do të mbështesin dhunën. Mbi të gjitha, ata u zbavitën sot.  

 

“Ishte shumë e lehtë dhe zbavitëse”,- u shpreh një maturante.

 

“Ishte shumë e bukur, erdhën në shkollë e na treguan, ishte e lehtë dhe u zbavitëm”,- theksoi një maturant. 

 

Vallëzimit të maturantëve iu bashkëngjitën edhe shefi i misionit të BE-së, Samjuel Zhbogar, dhe kreu i Shkupit, Koce Trajanovski.

 

“Uroj të shfrytëzoni sfidat e reja dhe përjetimet të cilat sinqerisht shpresoj që do të arrini me sukses t’i mbizotëroni me elanin rinor, energjinë dhe entuziazmin”,- tha kryetari i Qytetit të Shkupit, Koce Trajanovski. 

 

Organizatorët shpresojnë që ky shembull të trashëgohet në gjeneratat e ardhshme të cilat do të vazhdojnë traditën e deritanishme për të shpërndarë porosinë për paqe dhe tolerancë në botë. Për herë të parë vallëzimi i maturantëve u organizua në Lubljanë, në vitin 2001, ndërsa në Maqedoni për herë të parë u mbajt në vitin 2007, në Shkup dhe në Ohër.