Rektori i UEJL Zamir Dika, priti fituesit e kupës në futsall

Pas suksesit të korrur gjatë fundjavës, kur për herë të parë fitoi kupën e Maqedonisë në futsall, ekipi i Univerzitetit të Europës Juglindore, është pritur sot nga rektori i këtij univerziteti, profesor Zamir Dika.

Në takimin në të cilin ishin prezent të gjithë futbollistët, trajneri Afrim Jonuzi dhe përgjegjësi i departamentit të sportit, Menan Memedi, Dika, falenderoi haptas të gjithë, për këtë sukses, i cili sipas tij është shpërblim për punën e palodhshme që bëhet në ekip, tani e dhjetë vite.

“Një ndër konstatimet e mia është se pikërisht me vetmohimin, me mundin dhe punën që treguan studentët dhe anëtarët e ekipit tonë, për të arritur të marrin një kupë në rang nacional, tregon se ndonjëherë politikat që bëhen në nivel të univerzitetit dhe shtetit, duhet gjithmonë të jenë në interaksion me veprimet reale. Këta djelmosha dëshmuan me suksesin e tyre dhe mënyrën se si u transmetua ky sukses, qoftë në mediumet, në portalet elektronike apo stafit dhe studentëve të univerzitetit, se ne në politikë bërje duhet të jemi më afër me ata të cilët po shfrytëzojnë mjetet financiare apo përkrahjen e një institucioni”, u shpreh Zamir Dika.   

Sipas të pranishmëve në këtë takim, rektorit Zamir Dika, trajnerit Afrim Jonuzi, Menan Memedit e futbollistëve, kjo skuadër meriton çdo respekt dhe është më e sukses`shmja sivjet në futsall, pasi pos faktit që fitoj Kupën e Maqedonisë, në kampionat u plasua në pozitën e dytë, menjëherë pas kampionit Zhelezarecit. (Mustafa Ademi, TVM2)