Tiranë, ndryshime të tjera në Qeveri

Janë dekretuar sot nga presidenti Nishani ministrat dhe zëvendësministrat demokratë të qeverisë Rama, sipas marrëveshjes së arritur ditë më parë mes PS-së dhe PD-së.

Në orën 18 ka filluar edhe  seanca e jashtëzakonshme e Kuvendit ku duhet të votohen pikat e  marrëveshjes politike të 18 majit. Pika e parë është votimi i dekreteve të presidentit, Bujar Nishani, për lirim dhe emërim të zëvendëskryeministrit dhe të 6 ministrave.

Pika e dytë është shqyrtimi dhe miratimi i paketës ligjore që ka lidhje me reformën zgjedhore. Pika e tretë është miratimi i anëtarëve të pakicës parlamentare në tre komisionet “ad hoc” të Vettingut, si dhe caktimin e zëvendësuesve. Pika e katërt është zgjedhja e kryetarit të ri të Komisionit Qendror të Zgjedhjeve, që do të jetë propozim i opozitës, si edhe i një anëtari të KQZ-së.