Fati i “bombave” të PSP-së, Llazarova: mund të përdoren si dëshmi

Gjykata Supreme ka shtyrë për një tjetër afat të pacaktuar seancën ku duhet të vendoset nëse bisedat e përgjuara mund të përdoren si dëshmi në procedura gjyqësore.

 

Ish-gjykatësja për të drejtat e njeriut, Mirjana Llazarova - Trajkovska, e cila ishte e ftuar për të folur për praktikën e Gjykatës Europiane për të drejtat e njeriut, vlerëson se bisedat e përgjuara mund të përdoren si dëshmi. 

 

“Në masivitetin e një dukurie të paraqitur e cila ndërhyn në rrënjët sistematike të asaj dukurie, meriton të aplikohet principi i interesit publik në hetimin e të vërtetës dhe kjo është ajo që duhet t’i udhëheq gjykatësit, për shkak se praktika lejon aplikimin e dëshmive të tilla në seancat gjyqësore, por ato duhet të jenë nën llupën e  garancive për gjykim të drejtë, si dhe të akuzuarit të kenë të drejtë të kundërshtojnë dëshmitë e tilla dhe të kërkojnë kontrolle për vërtetësinë e të njëjtave”,- deklaroi ish-gjykatësja për të drejtat e njeriut, Mirjana Llazarova-Trajkovska.

 

Llazarova thotë se Gjykata Supreme nuk duhet të luaj rolin e ligjvënësit, por duhet të lejohet individualizimi i secilit rast. 

 

“Mendimi im është që individualizimi duhet të jetë princip udhëheqës, marrja e qëndrimeve primare në mënyrë gjenerale do të nënkuptonte marrjen e rolit të ligjvënësit nga ana e një gjykate të lartë”,- theksoi ish - gjykatësja për të drejtat e njeriut, Mirjana Llazarova – Trajkovska.

 

 Javën e kaluar kryetari i Gjykatës Supreme, Jovo Vangrellovski, në takim me gazetarët u shpreh se përgjimet ilegale nuk do të mund të përdoren si dëshmi, por vetëm si tregues për ekzistencë të një vepre penale.

 

Për vazhdimin e seancës do të njoftohet opinioni, theksuan nga shërbimi për marrëdhënie me publikun i Gjykatës Supreme.