Banka Popullore e Maqedonisë, 2,5 për qind rritje ekonomike për këtë vit

Banka Popullore e Republikës së Maqedonisë në projektimin e prillit parashikon rritje prej 2,5 për qind në ekonominë e Maqedonisë për këtë vit, pas çka do të vijonte përshpejtim në 3,2 për qind në vitin 2018, informon guvernatori i BPRM-së, Dimitar Bogov.

 

BPRM ka pritje të pandryshueshme për nivelin e inflacionit krahasuar me tetorin dhe pret përshpejtim të rritjes së çmimeve, gjegjësisht inflacionit prej 1,3 për qind këtë vit dhe dy për qind deri në vitin e ardhshëm.

 

 

BPRM pret ngushtim të deficitit të llogarisë vijuese në periudhën 2017-2018, deficit më të ulët në bilancin e mallrave dhe shërbimeve, rritje të ulët të të ardhurave sekondare, si dhe zgjerim të deficitit të të ardhurave primare.

 

Për këtë vit projektohet rritje e depozitave te sistemi bankar prej 4,2 për qind si dhe rritje kreditore prej 5,6 për qind. Sistemi bankar sipas BPRM-së edhe më tej është stabil, likuid dhe lartë i kapitalizuar.