Samiti i G7 në Sicili, Trump: Koreja e Veriut, problem i madh

Presidenti amerikan, Donald Trump, ka deklaruar se Koreja Veriore, që aktualisht ka kryer një seri të testeve raketore, është “problem i madh” në agjendën e politikës së jashtme të Shteteve të Bashkuara.

“Është shumë në mendjet tona...është problem i madh, është problem botëror dhe do të zgjidhet. Në një pikë ai do të zgjidhet. Ju mund të vëni bast në këtë”,- tha sot Trump në Sicili të Italisë, ku merr pjesë në Samitin e Grupit të 7 vendeve të industrializuara.

Programet raketore të Koresë Veriore janë parë si sfidë madhore e sigurisë për administratën Trump.

Presidenti amerikan ka shprehur përkushtim për ta parandaluar këtë vend që të jetë i aftë t’i godasë Shtetet e Bashkuara me raketë atomike.

Tema tjera kontestuese në Samitin G7 në Taormina janë: klima, tregtia dhe migrimi.

G7 përbëhet nga Kanadaja, Franca, Gjermania, Italia, Japonia, Britania e Madhe dhe Shtetet e Bashkuara.

Në këtë takim edhe Bashkimi Europian ka përfaqësuesin e tij.