Sri Lanka, mbi 170 të vdekur nga rrëshqitja e dheut

Operacione shpëtimi po zhvillohen në shumë zona dhe autoritetet presin që situata të përkeqësohet edhe më shumë, ndërsa ekipet e emergjencave mbërrijnë në fshatra të izoluara.

 

Mësohet se të paktën gjysmë milioni njerëz janë detyruar të braktisin banesat e tyre për shkak të përmbytjeve, ndërsa rreth 48 000 banesa janë shkatërruar apo dëmtuar.

 

Një nga zonat e goditura më rëndë është qyteti i Ratnapurës, vetëm 70 km larg kryeqytetit Kolombo, i cili u mbulua nga tre metra ujë. 

 

“Në këtë moment u bëj thirrje njerëzve që të ndihmojnë ata që kanë nevojë dhe që janë dëmtuar nga fatkeqësia pa menduar për racën, fenë apo përkatësinë e partive politike”,- u shpreh ish-presidenti i Sri Lankës, Mahinda Rajapaksa.

 

Autoritetet kanë nisur shpërndarjen e ndihmave dhe ushqimeve për të pastrehët, ndërsa në ato pak zona ku ujërat janë tërhequr, banorët janë kthyer për të gjetur vetëm shkatërrimin e lënë pas nga kjo katastrofë natyrore.

 

Banorët në shtatë rrethe me popullsi të dendur në jug dhe qendër të Sri Lankës u kërkua që të largoheshin nga rajonet e paqëndrueshme në rast të rrëshqitjeve të mëtejshme të tokës.

 

Departamenti i meteorologjisë në Gjirin e Bengalit parashikon shi rrebesh gjatë 36 orëve të ardhshme.