Hoyt Brian Yee: Ballkani, sfida serioze e ShBA-ve

Zëvendës ndihmës sekretari i Shtetit, Hoyt Brian Yee, deklaroi në një seancë të mbajtur për Ballkanin Perëndimor në Senatin amerikan se rajoni përballet me sfidat më serioze që nga viti 1990.

Ekspertët bënë thirrje për vazhdimin e angazhimit amerikan në Ballkan me qëllimin që të zmbrapset ndikimi rus, të shmanget përshkallëzimi i krizave e të mbështeten reformat dhe stabiliteti. Yee tha se nëse kërcënimet e jashtme dhe të brendshme nuk marrin përgjigje, ato mund të kenë pasoja serioze për Ballkanin Perëndimor, Europën dhe ShBA-në.

Yee përmendi disa përparime të arritura me mbështetjen amerikane, “me angazhimin tonë dhe të Europës, gjatë muajit të kaluar kemi parë disa suksese reale, si hyrjen e Malit të Zi në NATO. Udhëheqësit e Maqedonisë bashkëpunuan për të formuar një qeveri të re, opozita e Shqipërisë ra dakord që t’i japë fund bojkotit dhe të marrë pjesë në zgjedhje më 25 qershor dhe Serbia pritet të hapë dy kapituj të rinj me Bashkimin Europian këtë muaj”,- sqaroi ai.

Edhe kryetari republikan i nënkomisionit, Ron Johnson, këmbënguli se lidershipi amerikan është i nevojshëm në Europën Juglindore, duke shtuar se stabiliteti i Ballkanit është në interesin e Shteteve të Bashkuara.