Bashkim Amidi, u. d. kryetar i komunës së Likovës

Pas kalimit të kryetarit të deritashëm, Sadulla Durakut, në krye të Ministrisë së Ambientit Jetësor dhe Planifikimit Hapësinor, Këshilli Komunal i Likovës për u. d. kryetar emëroi Bashkim Amidin, këshilltar i deritashëm në Këshillin Komunal. Në një ceremoni rasti, ministri Duraku ia dorëzoi postin e u. d. kryetar i Komunës Bashkim Amidit, duke i dëshiruar suksese në vazhdimin e drejtimit të Komunës.

 

“Komunën e Likovës e kam gjetur me 800 mijë euro borxh, kurse tani komuna e Likovës me të gjitha projektet që kemi realizuar deri më tani dhe projektet që janë në vazhdimësi, unë uroj që kryetari të porsaemëruar të kësaj komune e ka borxh zero. I uroj sukses dhe shëndet kryetarit të porsazgjedhur dhe besoj se me stafin e komunës do t’i kryejë punët dhe do t’i vazhdojë projektet e filluara”,- tha ministri i Ekologjisë, Sadulla Duraku.

 

“Unë vij nga këshilli i Komunës, do të vazhdojmë me punën dhe programin që ka kaluar në Këshill. Besoj se nuk do të kem problem për kryerjen e këtyre e obligimeve”,- theksoi u. d. kryetar i komunës së Likovës, Bashkim Amidi.

 

Ndryshe, Bashkim Amidi është i punësuar në Postat e Maqedonisë - njësia në Kumanovë.