Shqipëri, ashpërsohet fushata për zgjedhjet e 25 qershorit

Me një gjuhë të ashpër, LSI ka denoncuar kryeministrin, Edi Rama, për thirrje antikushtetuese ndaj policisë që të mbledhë votat për Partinë Socialiste. 

 

Në kërkesë-padinë e LSI-së thuhet se këto thirrje përbëjnë ngjarjen më të rëndë të thyerjes së ligjit, pasi kryeministri ka shkelur të gjithë hierarkinë shtetërore të akteve ligjore. Për këtë arsye, LSI kërkon mbledhjen e Këshillit të Sigurisë Kombëtare si dhe bërjen e një kontrolli mjekësor për kryeministrin, pasi ai është i paaftë mendërisht për të pasur këtë funksion.

 

Ndërkohë, Rama e Basha kanë vijuar takimet elektorale. Nga Paskuqani i Tiranës, kryeministri tha se arsyeja e krisjes së koalicionit qeverisës ishte reforma në drejtësi, pasi LSI nuk e ka dashur.

 

Ndërsa Basha u ndal në Kavajë, ku deklaroi se më 25 qershor do të shkëputet lokomotiva e fundit e trenit të republikës së vjetër.

 

Më 25 qershor do të zhvillohen zgjedhjet e përgjithshme parlamentare si dhe zgjedhjet për kreun e Bashkisë së Kavajës.