Tenderi i ri i ELEM-it, reagon Lëvizja “Besa”: Është i dyshimtë

Lëvizja “Besa” ka reaguar pas tenderit të rëndë afro 47 milionë euro të shpallur nga ELEM, për ndërtimin e sistemit të ngrohjes në Manastir.

Nga “Besa” pyesin publikisht qeverinë e re, se nëse ky tender është fillimi i bashkëpunimit të qeverisë së re me të vjetrën, për interesa materiale.

“Arsyetimi se ELEM nuk e mori parasysh kërkesën e zëvendëskryeministrit për çështje ekonomike të qeverisë së re, Koço Angjushev,  që të anulohet ky tender, nuk është bindës për opinionin e as për ne”,- thonë nga “Besa”.

Sipas saj, nëse qeveria e re mundohet të bindë opinionin se do por nuk mundet të ndalë tenderin në ELEM për shkak të drejtorëve të pushtetit të kaluar, kjo dëshmon sa shumë gaboi kryeministri i ri kur vendosi që në kabinetin e tij të përfshijë elemente të ricikluara të regjimit të kaluar.

Lëvizja “Besa” paralajmëron se nuk do të tolerojë marrëveshje në dëm të taksapaguesve në Maqedoni.