Eurointegrimi, përplasen Zhbogar e Miloshoski

Euroambasadori, Samuel Zhbogar, iu përgjigj troç akuzave të deputetit të VMRO-DPMNE-së se fajtor për moshapjen e bisedimeve me BE-në është fqinji jugor, Greqia.

 

“Mund të përgatisim dokumente reformuese, prioritete dhe udhërrëfyes, dhe në vizitën e radhës së z. Zaevit dhe Bujar Osmanit në Bruksel, do t’u thuhet se RM nuk do të fillojë bisedimet për anëtarësim në BE, përderisa Athina zyrtare vendos veto në rekomandimet e BE-së”,- deklaroi Antonio Milloshoski nga VMRO-DPMNE.

 

“BE nuk mund të fillojë bisedime me një shtet që KE e kishte përshkruar si shtet i robëruar. Unë desha të sqaroj me shembuj se çfarë nënkuptojmë me shtet i robëruar dhe kjo ishte arsyeja kryesore se pse BE nuk negocion”,- theksoi ambasadori i BE-së, Samuel Zhbogar.

 

Edhe zëvendëskryeministri për çështje europiane, Bujar Osmani, konsideron se kriza politike dhe institucionale kanë penguar këtë proces. Sipas tij, konstituimi i parlamentit paraqet përmbyllje formale të një krize të thellë institucionale dhe politike, e cila dëmtoi rëndë imazhin e vendit para partnerëve dhe la pasoja mbi demokracinë. 

 

“Mendoj se detyra jonë kryesore si politikanë tash është të bëjmë ç’është  e mundur për ta rikthyer vendin në rrugën e integrimit drejt BE-së dhe NATO-s, të përmirësojmë imazhin e dëmtuar para botës dhe të rikthejmë demokracinë dhe sundimin e ligjit”,- tha zëvendëskryeministri, Bujar Osmani.

 

Edhe deputetët e Lëvizjes “Besa”, thonë se ngecja e eurointegrimeve ka ndodhur për shkak të mungesës së kapaciteteve vendore, ndërkaq deputetët e LSDM-së ftuan në konsensus për çështje me interes shtetëror, siç është integrimi në NATO dhe BE. 

 

“Të dëshmojmë me të vërtetë se interesat mbipartiake për RM-në janë anëtarësimi në BE dhe NATO, mund të sjellin deri në konsensus mes të gjitha partive politike për çështje me interes edhe për qytetarët, edhe për RM-në si vend”,- u shpreh Frosina Remenski nga LSDM.

 

“Maqedonia gjatë kësaj kohe ka dëshmuar mungesë të kapaciteteve vendore për ta avancuar sundimin e të drejtës, për ta avancuar demokracinë dhe liritë e njeriut në Maqedoni”,- tha Zeqirija Ibrahimi nga “Besa”.

 

Debati u zhvillua në mbledhjen e parë të Komisionit për Çështje Evropiane ku u shqyrtuan Raporti i Komisionit Evropian për vitin 2016 dhe Rezoluta e Parlamentit Evropian e 14 qershorit të këtij viti.