Erdogan kërcënon Gjermaninë: Po kryeni vetëvrasje!

 

Lideri turk tha se personalisht nuk kishte probleme me kancelarin gjermane Angela Merkel dhe se do ta takonte gjatë samitit të G20-ës në datat 7-8 korrik.

 

Por, ai tha se i kishte kërkuar Merkelit t’i dorëzojnë (mbështetësit e Gylenit). “Pse nuk na i kthejnë?”, pyeti ai. 

 

Erdogan po ashtu tha se do vazhdojë ta shikojë Gjermaninë si parajsë për terroristët derisa të dorëzojë mbështetësit e Fetullah Gylenit, klerikut të akuzuar për grushtin e dështuar të shtetit në Turqi.

 

Javën e kaluar Ankaraja kërkoi zyrtarisht leje që Erdogani t’u drejtohej me një fjalim qytetarëve turq që jetojnë në Gjermani, por ministri gjerman i Punëve të Jashtme, Sigmar Gabriel e ka këshilluar Presidentin të mos mbajë fjalime publike në një kohë që marrëdhëniet Turqi-Gjermani janë në një situatë konfliktuale.

 

Gjermania po ashtu tha se nuk kishte forca të mjaftueshme policie të siguronte mitingun e Erdoganit në kohën e samitit të G20-ës, diçka që u cilësua “justifikim” nga Turqia.

 

Marrëdhëniet mes dy vendeve janë përkeqësuar ndjeshëm vitin e fundit, duke nisur me njohjen e gjenocidit ndaj armenëve nga ana e Bundestagut, me krizën e moslejimit të ministrave turq të mbanin mitingje në Gjermani para referendumit në Turqi, moskthimin e mbështetësve të Gylenit dhe tani sëfundmi me moslejimin e deputetëve të Bundestagut të vizitojnë ushtarët gjermanë në bazën ajrore të Incirlikut, çka bëri që Gjermania të kërcënojë me tërheqje të trupave të saj nga Turqia./tvklan.al