Tiranë, parlamenti debaton mbi raportin e K.E.

Një ditë pas dhënies së sinjaleve pozitive për statusin kandidat nga Komisioni Evropian, opozita shqiptare ka shprehur skepticizmin e saj, duke i kërkuar socialistëve që të mos ekzaltohen.

 

Ish-ministrja e Integrimit, Majlinda Bregu, iu drejtua ministrit Ditmir Bushati sot në Parlament, se kjo është hera e tretë që rekomandohet statusi, por nuk është dhënë, ndaj sipas saj, shqiptarët duhet të presin deri më 27 qershor, ditën kur do të jepet përgjigja përfundimtare për statusin.

 

Ndërsa Ministri i Jashtëm i Shqipërisë, Ditmir Bushati, ka ritheksuar se statusi u dha pa kushte, ndërsa në raport nuk ka asnjë fjalë për drogën.

 

Dhënia e statusit kandidat për Shqipërinë është përcjellë me nota pakënaqësie brenda Unionit të BE-së.

 

Zëdhënësi i partisë Alternativa për Gjermaninë, Alexandër Gauland, është shprehur sot në një media gjermane se rekomandimi i komisionarit për Zgjerim në BE, Stefan Fyle, është i papërgjegjshëm. Sipas tij, nuk mjafton vetëm vullneti i mirë si kriter për të marrë statusin.