Pasaportat e kryesisë së VMRO–së, vendimi gjyqësor në afat prej 48 orësh

Nuk kam qëllim të ik, po përgatitem t’i fitoj zgjedhjet dhe të kthehem në pushtet. Kështu deklaroi ish-kryeministri, Nikolla Gruevski, para këshillit të Gjyqit të Apelit, ku në rend dite ishin ankesat për rastin “Titanik”.

Sipas tij, marrja e pasaportës është tentim për eliminim politik dhe për ndikim tek besimi i qytetarëve. Gruevski tha se nuk ka kryer vepër penale dhe se kundër tij zhvillohet “hajkë” politike.                                                                                               

“Unë planifikoj që zgjedhjet e ardhshme t’i fitoj, si parti politike, si udhëheqës i partisë politike dhe përsëri VMRO-DPMNE të kthehet në pushtet dhe jo të ik nga vendi. Asnjëherë nuk iu kam ikur ftesave të PPS-së, çdoherë gjatë udhëtimeve i kam informuar se jam jashtë shtetit edhe pse nuk e kam pasur obligim ta bëj këtë”,- deklaroi ish-kryeministër, Nikolla Gruevski.                                                                                                                                                                               

Premtime se nuk do të ikin dhe rregullisht do të paraqiten në gjyq dhe në prokurori dhanë edhe tre funksionarë të mëhershëm të VMRO-DPMNE-së, ish-ministrja e Punëve të Brendshme, ai i Transport si dhe sekretari gjeneral i mëparshëm i Qeverisë. Edhe për ta PPS kërkon paraburgim, pasi në lëndën “Titanik” akuzohen për keqpërdorim të pozitës zyrtare dhe mjeteve për financimin e fushatës zgjedhore. Të akuzuarit thonë se nuk i kanë kryer këto vepra dhe kërkuan që procesi sa më shpejtë të fillojë që të dëshmojnë pafajësinë.                                                               

“Nuk kam dhënë arsye që të propozohet masë kundër meje, e lëre më të shqiptohet kundër meje. Unë besoj në objektivitetin e gjykatës dhe besoj se gjykatësit do të punojnë në pajtueshmëri me ligjin, argumentet dhe faktet, dhe nuk do solidarizohen me plotësimin e një agjende politike”,- theksoi ish-ministrja e MPB-së, Gordana Jankullovska.

Ndërkohë, PPS ka frikë se të akuzuarit mund të ikin dhe të ndikojnë tek dëshmitarët për këtë kërkohet paraburgim. Nuk ka efekt nga deklaratat e dëshmitarëve të dhëna gjatë hetimit nëse në seancë e ndryshojnë deklaratën.                                                                             

“Vetë e patë se në Ohër një nga deputetët bënte ftesë që të mos jepen deklarata. Kjo paraqet rrezik me të cilin mbrohet rrjedha e mëtejshme e hetimit dhe vërtetimin në fund të së vërtetës”,- tha Gavrill Bubevski nga PPS.

Derisa PPS insiston që të ketë paraburgim, mbrojtja kërkoi që të akuzuarit t’i kthehet pasaporta nga Gjykata e Shkallës së parë si masë kujdesi. Nuk mungoi edhe reagimi i VMRO-DPMNE-së, nga e cila kanë deklaruar se PPS është prokurori politike, e drejtuar nga ana e LSD-së me një qëllim të vetëm, ta nxijnë udhëheqësinë e kësaj partie.                                                                                                

“Tanimë secili e ka të qartë mënyrën me të cilën një institucion i shekullit 21 në një vend demokratik krijon raste të montuara politike pa dëshmi, pa argumente bazë, jashtë prej të gjitha normave dhe standardeve ligjore. PPS-ja është faqe e errët e gjyqësisë së Maqedonisë, ndërsa qytetarët e shohin se është instrument politik dhe turpërohen prej tij”,- u shpreh Darko Kostovski nga VMRO-DPMNE.

Në Gjykatë nuk u paraqit vetëm shefi i kabinetit të Gruevskit, Martin Protugjer, për të cilin mbrojtja dorëzoi vërtetim mjekësor. Për 48 orë gjykata duhet të vendos nëse do t’u kthehen të akuzuarve pasaportat. (Flutura Latifi, TVM2)