Dritë jeshile ligji për gjuhët, avancohet përdorimi i gjuhës shqipe

Qeveria miratoi  propozim ligjin për përdorimin e  gjuhëve, që është  pjesë e marrëveshjes mes partnerëve të koalicionit qeveritar, që del nga harmonizimi i programit kombëtar  me rezolutat e Bashkimit Evropian,.

 

Sapo ligji të miratohet në kuvend, ministria e drejtësisë, përmes ministrisë për punë të jashtme, do të dorëzojë ligjin dhe cështjet ende të hapura që nuk janë pjesë e tij, në Komisonin e Venecias , prej të cilit do të kërkojë mendim për paketën e zgjidhjeve ligjore.

 

Sipas këtij propozim- ligji: 

 

 

 

Gjuha shqipe dhe alfabeti i saj do të përdoret edhe në seancat e qeverisë, komisionet si dhe kolegiumet gjenerale , kur me to udhëheq një funksionar shqiptar. Gjithashtu edhe dokumentacioni I përdorur në materialet e punës,  do të mund të jetë edhe në shqip për funksionarët shqiptarë, bashkë me stenogramet dhe materialet e dokumentacionin tjetër që kalon përmes arkivit.

 

Të gjitha aktet e miratuara nga ana e Qeverisë së Republikës së Maqedonisë jepen dhe shpallen në gjuhë maqedonase dhe alfabetin e saj cirilik dhe në gjuhën të cilën e flasin më së paku 20% e qytetarëve në RM dhe alfabetin e saj, thuhet në pikën 7 të nenit 5 të propozim ligjit. 

 

Propozim ligji parasheh që banknotat  dhe pullat postale,  të përmbajnë simbole që janë të rëndësishme për popujt maqedonas dhe shqiptarë por jo edhe përdorimin e shqipes.

 

Në këtë pjesë të Propozim ligjit qëndron: ‘Kartëmonedhat dhe monedhat si dhe pullat postale,  do të përmbajnë simbole që përfaqësojnë trashëgimi kulturore për qytetarët të cilët flasin gjuhën  maqedonase dhe e përdorin alfabetin e saj cirilik dhe gjuhën të cilën e flasin së paku 20 për qind e qytetarëve të RM-së dhe alfabetin e saj’.  

 

Në versionin e miratuar parashihet dygjuhësi në uniformat e policisë, zjarrfikësve dhe të punësuarve në sektorin e shëndetësisë në komunat me mbi 20 për qind banorë shqiptarë, si dhe në Bashkinë e Shkupit.

Në tekstin e ligjit thuhet: ‘Uniformat e policisë, zjarrfikësve dhe punonjësve të shëndetësisë, në Shkup dhe në komunat në të cilat 20 për qind e banorëve flasin gjuhë zyrtare të ndryshme nga gjuha maqedonase,  janë të shkruara në gjuhën maqedonase dhe alfabetin e saj cirilik, si dhe në gjuhën të cilën e flasin së paku 20 për qind e qytetarëve në Republikën e Maqedonisë dhe në alfabetin e saj’.  

 

Për dygjuhësinë në uniformat e Armatës, do të pritet mendim nga Komisioni i Venecias.