45 viktima nxirren nga varreza masive në Rashkë

Në lokacionin e varrezës masive në Rudincë të Rashkës, në Serbi, kanë vazhduar punët kërkimore për gjetjen e mbetjeve mortore. 

 

Në lokacionin ku janë duke u bërë gërmimet janë zbuluar trupat e 40 viktimave dhe mbetje të tjera mortore. Sipas raportit të Departamentit të Mjekësisë Ligjore, numri i viktimave të zbuluara deri më tash vlerësohet të jetë 45.

 

Sipas Drejtorit të Departamentit të Mjekësisë Ligjore, Arsim Gerxhaliu, pjesa më e madhe e këtyre mbetjeve mortore janë zbuluar në pjesën veriore të varrezës masive. Ai ka paralajmëruar vazhdimin e gërmimeve në këtë lokacion, ku dyshohet se gjendet edhe një varrezë masive.

 

“Gjetjet mortore të ekshumuara i janë nënshtruar procesit të autopsisë dhe identifikimit të mbetjeve mortore, kurse në javët në vazhdim parashihet të bëhet hulumtimi i terrenit në afërsi ,ku supozohet të ketë edhe një varrezë tjetër”, ka thënë Gerxhaliu.

 

Në këtë lokacion janë duke kryer hulumtimet ekspertët e Departamentit të Mjekësisë Ligjore, ekspertët e misionit të EULEX-it, ekspertë nga Serbia, nga Komiteti Ndërkombëtar i Kryqit të Kuq dhe ICMP.