Deputetët i rikthehen punës në Kuvend, në agjendë prokurori dhe Ligji për gjuhët

Propozimi i qeverisë për të shpallë zgjedhjen e kryeprokurorit të ri është vënë në agjendën e Kuvendit, nga kryeparlamentari Xhaferi, që në seancën e parë pas pushimit, përkatësisht në seancën e 12 të caktuar për më 04 shtator. 

 

“Marrë parasysh që prokurori publik, Marko Zvërlevski, me vendim të Kuvendit të Republikës është shkarkuar nga funksioni prokuror publik i RM-së, Qeveria i propozon Kuvendit që të shpall zgjedhjen e prokurorit publik të RM-së”, – thuhet në propozimin e Qeverisë.  

 

Në seancën e njëjtë parashihet të miratohet edhe propozim vendimi për zgjedhjen e nënkryetarëve të Kuvendit. Propozohet që Kuvendi të ketë pesë nënkryetarë. Pa zgjedhur kanë mbetur edhe zëvendësit e sekretarit gjeneral të Kuvendit.

 

Një çështje tjetër me prioritet që pritet të vihet në seancat e para pas pushimit është edhe propozim ligji për përdorimin e gjuhëve të bashkësive joshumicë, me të cilin parashihet avancimi i përdorimit të gjuhës shqipe. Sipas të gjitha gjasave, ky ligj do të vihet për diskutim në seancën e 13-të, të paraparë për më 11 shtator, kur do të shqyrtohen edhe iniciativat për interpelancën e disa ministrave.  

 

Kuvendi do të hap punimet nesër, me mbledhjen e Komisionit për Mbikëqyrje mbi Punën e Drejtorisë për Siguri dhe Kundërzbulim dhe Agjencisë për Zbulim, ku do të shqyrtohen raportet e punës së agjencive përkatëse për vitin 2016.