Gruevski: Të vazhdojnë investimet e huaja në Maqedoni

Lideri i VMRO – DPMNE - së, Nikolla Gruevski, apeloi deri te Qeveria e re të vazhdojë me bisedat me investitorët e huaj dhe të tërheqë investitorë të rinj që do të krijojnë vende të reja pune.

 

Si tepër të dëmshme ai e vlerësoi vendimin për deklasifikimin dhe shpalljene subvencioneve që ofrohen për kompanitë e huaja në Maqedoni, duke thënë se me këtë vendim Qeveria e dëmton nivelin konkurues të shtetit në krahasim me shtetet tjera fqinje dhe rajonale, të cilët poashtu garojnë për të tërhequr investitorë të huaj.

 

Si sinjal tjetër brengosës, Gruevski e vlerësoi tërheqjen e 33 promovuesve për investime nga Evropa, Amerika dhe Azia, si dhe paralajmërimin se Maqedonia më nuk do të reklamohet në CNN dhe media tjera botërore pasi që konsiderohen shpenzim i panevojshëm për vendin.

 

“Apeloj deri te Qeveria që të vazhdojë me hapjen e vendeve të reja të punës edhe nëpërmjet kompanive vendase, edhe me investime të huaja. Kompanitë e huaja që hapën kapacitete të tyre në Maqedoni, në mënyrë të dukshme kanë ndikuar në uljen e papunësisë në Maqedoni, nga 38 për qind në 22.9 për qind, kur VMRO - DPMNE lëshoi Qeverinë”, tha Nikolla Gruevski, lider i VMRO–DPMNE- së.