Ndryshimet në KShZ, Ibraimi: ndryshimet në Kodin Zgjedhor, joligjore

Ibraimi ka dërguar kërkesë deri tek kryeparlamentari Xhaferi për shfuqizimin e vendimit të shpalljes së konkursit për emërim të anëtarit të ri në KShZ. Ibraimi vlerëson se mandati i tij ende nuk ka përfunduar dhe ndryshimet në Kodin Zgjedhor janë joligjore.

Kjo, sipas tij, është parregullsia e parë e zgjedhjeve lokale të 15 tetorit.

“Për ta sjellë vendimin kundërthënës, së pari duhet të sillet vendim për shkarkimin e anëtarit të KShZ-së dhe më pas të shpallet konkurs për anëtarë të ri. Vendimi i Kuvendit është joligjor”,- tha Ibrahimi.

Për të është e çuditshme se si ligjet nuk respektohen pikërisht nga organi ligjdhënës. Ai pohon se me ndryshimet në Kodin Zgjedhor sulmohet një anëtar i KShZ-së, duke u harruar fakti se ndryshime të tilla implikojnë edhe përzgjedhjen e tre anëtarëve të tjerë që vijnë  si propozim i përbashkët i pushtetit dhe opozitës.

Ibraimi përkujton edhe nenin e Kodit Zgjedhor, sipas të cilit nga data e shpalljes së zgjedhjeve deri në përfundimin e tyre rreptësisht ndalohet fillimi i çfarëdolloj procedure për ndërprerje të marrëdhënieve të punës për të punësuarit në institucionet shtetërore.

Paralajmëroi se do të ankohet në Komisionin për anti-korrupsion, Inspektoratin e punës dhe gjykatat kompetente. Kuvendi miratoi vendimin për emërimin e një anëtari të ri në KShZ, sipas të cilit,  vendin e Bedredin Ibrahimit nga PDSh duhet ta marrë një përfaqësues i Lëvizjes BESA, si partia e dytë me më shumë vota tek shqiptarët.