Zgjedhjet lokale 2017, Koalicioni “Aleanca për Shqiptarët” në Gostivar

Koalicioni “Aleanca për Shqiptarët” (RDK dhe UNITETI) mbajti mbrëmë konventën promovuese në Gostivar ku u bë promovimi i kandidatëve për kryetarë komune dhe listës së këshilltarëve për Komunën e Gostivarit, Dibrës, Kumanovës dhe Çairit.

“Shqiptarët ndodhen para sfidave të mëdha të ballafaqimit kundër projekteve antikombëtare dhe antifetare, që përgatiten nga kuzhina të ndryshme”,- deklaroi kryetari i RDK-së, Vesel Memedi.

“Vizioni dhe misioni i Koalicionit “Aleanca për Shqiptarët” është i njëjti vizion që nga dita e parë e themelimit dhe ky rrugëtim do të vazhdojë edhe më tutje, deri në realizimin e plotë të barabarësisë së plotë të të gjithë qytetarëve në këtë shtet”,- u shpreh Gëzim Ostreni nga UNITETI.

Me pjesë nga platforma dhe programi i tij të quajtur “E vërteta për Gostivarin”,  u paraqit edhe kandidati për kryetar të Gostivarit, Shpat Iseini.

Të pranishmëve iu drejtuan edhe kandidati për kryetar të Komunës së Dibrës, Shkëlqim Xhafa, si dhe bartësit e listës për Gostivarin dhe Kumanovën. (Lulzim Haziri, TVM2)