Shuto Orizare, përleshje mes dy grupeve, lëndohet Elvis Bajram

Policia konfirmoi incidentin, por nuk ka dhënë më shumë detaje. Ndërsa kryetari aktual dhe kandidati për kryetar të kësaj komune si pjesë e koalicionit me VMRO-DPMNE-në, Elvis Bajram, pasi mori lëndime u dërgua në Spitalin e përgjithshëm të qytetit "8 Shtatori".

 

Deputeti, Amdi Bajram, ka dënuar ashpër dhunën fizike ndaj djalit të tij dhe ka deklaruar se pas sulmit qëndrojnë përkrahësit e LSDM-së. Ai kërkon nga MPB-ja që të zbardhë rastin dhe t'i nxjerrë fajtorët para drejtësisë. LSDM e ka dënuar sulmin ndaj Elvis Bajram duke theksuar se dhuna është e patolerueshme dhe kërkon nga institucionet të zbardhin rastin.

 

LSDM, gjithashtu, iu bën thirrje gjithë qytetarëve dhe subjekteve politike të mos bien në provokime dhe të jenë të vetëdijshëm për realizimin e zgjedhjeve fer, demokratike dhe të lira. Ka reaguar edhe Qendra për liri – “Civil”, nga e cila thonë se pa dallim nëse hetimet vërtetojnë prapavijë politike ose kriminale, dhuna është e papranueshme. Edhe pse ekipet monitoruese të “Civilit” jozyrtarisht mësojnë se bëhet fjalë për llogari kriminale edhe në rastin e Kërçovës dhe në rastin e Shuto Orizares, simptomatike është fakti pasi bëhet fjalë për kandidat për kryetar dhe këshilltar komunal.

 

“Dhuna në kohën e zgjedhjeve, pa marrë parasysh motivet, e rrënon karakterin demokratik në proceset zgjedhore dhe vendos në pikëpyetje themelet e shoqërisë dhe shtetit. Asnjëherë diçka e mirë nuk mund të dalë nga dhuna, përveç humbjeve tragjike të jetës, frikës dhe kaosit”,- thuhet në njoftimin e “Civilit”.