Zgjedhjet lokale, vazhdojnë akuzat e kalkulimet për koalicione

Nga BDI thonë se 100 mijë votat e fituara të dielën rikonfirmuan besimin e 11 radhazi të qytetarëve për ofertën më të mirë.

 

“Më lejoni që të rikonfirmoj mbi 100.000 vota të qytetarëve për BDI-në, edhe për listat e këshilltarëve të partisë sonë, edhe për kandidatët tanë për kryetarë komunash në veçanti. Kjo fitore plebshitare u takon juve dhe ne ju shprehim mirënjohje të thellë që edhe një herë, për të 11 herë radhazi, ju e dhatë besimin tuaj për Ali Ahmetin, BDI-në dhe ofertën më të mirë”,- deklaroi zëdhënësi i ShQZ-së nga BDI, Arbër Ademi.

 

Nga Lëvizja BESA, ndërkohë, thanë se këto vota janë plafoni që mund të arrijë koalicioni LSDM-BDI, e në balotazh integristët mund të mbështeten vetëm në votat e LSDM-së.

 

“Ky është plafoni i votave të koalicionit LSDM-BDI, BESA ka vota rezervë të opozitës shqiptare me të cilat shkon në balotazh, BDI mundet vetëm të mbështetet në votat e VMRO-së”,- u shpreh kryetari i Lëvizjes BESA, Bilall Kasami.

 

Aleanca për Shqiptarët vlerëson se rezultati i raundit të parë vulos fitoren edhe në raundin e dytë për Strugën. Në Gostivar, Aleanca pret  përkrahje nga Lëvizja BESA dhe RDK.

“Kushdo që do të jetë kundërkandidat në raundin e dytë, ne do t’i fitojmë zgjedhjet si Aleancë për Shqiptarët. Ky është vullneti i popullit dhe atë nuk ka çfarë e ndalë”,- theksoi kryetari i Partisë Aleanca për Shqiptarët, Zijadin Sela.

 

“Ne i kemi duart e zgjidhta që të ulemi dhe të bisedojmë me BESËN, RDK-në, PDSh-në dhe me të gjitha partitë e tjera shqiptare”,- tha Arben Taravari nga Aleanca për Shqiptarët.

 

Por, kreu i RDK-së, Vesel Mehmeti, mohon se do t’i japë përkrahje Aleancës, duke e akuzuar partinë e Selës se tradhtoi koalicionin e zgjedhjeve parlamentare duke u vënë në shërbim të pushtetit të kaluar.

 

Edhe Partia Demokratike Shqiptare akuzon partitë e tjera shqiptare për koalicione me partnerët maqedonas. 

 

“Koalicioni BDI-LSDM ishte publik, transparent dhe i paralajmëruar, ndërsa koalicioni i fshehtë i BESË-s dhe Aleancës me VMRO-në në komuna të caktuara ishte përcaktuese për rezultatet e këtyre zgjedhjeve. Mjafton të shikojmë rezultatet e zgjedhjeve në Strugë, Dibër, Gostivar, Bogovinë dhe Negotinë-Vrapçisht, ku duket qartazi bashkëpunimi i ngushtë mes Aleancës dhe VMRO-së. Po ashtu nëse i shohim rezultatet në komunat Brvenicë, Tetovë, Tearcë, Saraj dhe Çair, duket qartë koalicioni BESA – VMRO”,- potencoi nënkryetari i PDSh-së, Bardhyl Dauti.

 

Raundi i dytë i zgjedhjeve lokale do të mbahet më 29 tetor dhe ka dy javë kohë për t’u kuptuar koalicionet e reja të partive politike.