“Ofelia” përplaset mbi Irlandë, tre viktima, 360.000 njerëz pa energji elektrike

Të tre viktimat humbën jetën pasi mbi ta ranë pemët që i shkuli era e fuqishme.

 

Ishulli i Irlandës është paralizuar tërësisht. Më shumë se 360 mijë banesa e biznese kanë mbetur pa energji elektrike, mbi 1300 të tjera në Irlandën e Veriut, dhe kjo gjendje pritet të zgjasë.

 

“Të gjitha resurset janë në gatishmëri, gjithashtu dhe ushtria. Janë bërë  dëme të mëdha dhe në ditët e ardhshme do të përqendrohemi të kthejmë vendin në gjendje normale. Do na vijnë në ndihmë ekipe edhe nga Mbretëria e Bashkuar dhe nga Irlanda e Veriut. Po punojmë të lidhim energjinë elektrike për të gjithë”,- u shpreh kryeministri i Irlandës, Leo Varadkar.

 

Por, edhe përkundër shkatërrimit, ka njerëz që nuk kanë shkuar në strehimore, por kanë dashur të shohin nga afër “Ofelian” dhe fuqinë e saj shkatërruese.

 

Thonë se një rast i tillë të vjen vetëm një herë në jetë dhe pa marrë parasysh rrezikun ata kanë dalë buzë detit të egërsuar.

 

“Është gjendje shumë e keqe këtu në port për momentin. Unë erdha të shoh detin nga afër”,- u shpreh banori i zonës, Kevin Aylvard.

 

“Deti është egërsuar, por dua ta shoh sepse kurrë nuk e kemi parë një stuhi të tillë”,- theksoi banori i zonës, Colin Griffin. 

 

“Unë jam peshkatar dhe jemi mësuar me det të trazuar, por kjo është diçka spektakolare”,- tha peshkatari, Josef Jullena.

 

Edhe Uellsi e Skocia janë në alarm maksimal si pasojë e stuhisë së fuqishme. Autoritetet britanike u kanë bërë thirrje qytetarëve të largohen nga banesat në zonat e rrezikut. 

 

Uragani “Ofelia” ka shkaktuar viktima edhe jashtë ishujve britanikë.