Ivanov në “Crans Montana”: “Status quo”-ja e lë Ballkanin të pambrojtur

Presidenti Ivanov ka kërkuar nga BE që të tregojë vendosshmëri dhe t’i japë Maqedonisë datë për fillimin e bisedimeve për anëtarësim. Në fjalimin e tij në forumin “Crans Montana”, që mbahet në Bruksel, Ivanov theksoi se BE duhet të jetë më e vëmendshme ndaj Europës Juglindore.

“Shtyrja e zgjerimit të BE-së ndërlikon gjendjen, ndërsa gjendje “status quo” në integrime, në kombinim edhe me krizën ekonomike dhe rreziqet e sigurisë, e bëjnë Ballkanin dhe Maqedoninë më të pambrojtura. Me çdo kapitull të mbyllur, vendi europianizohet dhe afrohet drejt standardeve të dëshiruara europiane. Unioni duhet të kuptojë se procesi i zgjerimit nuk është teknik, por para së gjithash çështje politike dhe strategjike. Mesazhi për BE-në është t’i kushtojë vëmendje më të madhe Europës Juglindore”,- deklaroi presidenti, Gjeorge Ivanov.

Iniciativa 16 plus 1 mund t’i ndihmojë vendeve të Europës Juglindore, Qendrore e Lindore, që të lidhin infrastrukturën e tyre duke kompletuar projektin për lëvizje të lirë të qytetarëve dhe mallrave. Por, e gjithë kjo është e kotë pa elementin e tretë, që është zgjerimi i Unionit,  potencoi Ivanov në fjalimin e tij. (Gyltene Sinani, TVM2)