Zgjedhjet lokale 2017, “Most”: Parregullsi në disa komuna

Sipas informatave të konfirmuara nga vëzhguesit dhe zyrat rajonale të Asociacionit “Most”, deri më tani janë vërejtur parregullsi më të theksuara në komunën e Shuto Orizares, Butel, komunën e Demir Kapisë, komunën e Çairit etj.

 

Në komunën e Demir Kapisë janë vërejtur numër më i madh i personave që kanë votuar në shoqërim, ndërsa në komunën Ceshinë-Obleshevë votuesi ka mohuar të spërkatet me sprej të padukshëm dhe sërish i është lejuar të votojë.

 

“Në vendvotimin 2957 dhe 2958 në komunën e Shuto Orizares janë vërejtur nga pesë raste të votimit familjarë, ndërsa në vendvotimin 2959 gjithashtu në komunën e Shuto Orizares janë vërejtur edhe 8 raste të njëjta. Në vendvotimin 2929 dhe 2930 në komunën e Butelit dy votues janë nënshkruar në vend joadekuat të listës zgjedhore, ku Komisioni Zgjedhor ka përpiluar raport për të njëjtën. Në komunën e Shuto Orizares, vendvotimi 2955, tre raste në të cilat anëtarë të Komisionit Zgjedhor u kanë ndihmuar votuesve të votojnë dhe u kanë sugjeruar se për kë të votojnë. Në komunën e Çairit, votuesi ka fotografuar fletëvotimin, me çka është thirrur policia dhe votimi për kohë të shkurtër është ndërprerë”,- tha Zlatko Dimitriovski nga “Most”.

 

Gjatë vëzhgimit në terren, “Most” raporton edhe për probleme teknike gjatë procesit të votimit. Në komunën e Shuto Orizares dhe komunën e Butelit, votimi është ndërprerë për shkak të mosfunksionimit të llambës ultra vjollcë. 

 

Procesin zgjedhor Asociacioni “Most” po e vëzhgon me mbi 1000 vëzhgues.