Rasti “Kumanova”, Haradinaj: Hetim ndërkombëtar për rastin

Pas vendimit të Gjykatës Themelore në Shkup, për dënimin me 746 vjet burg të 37 personave të akuzuar për rastin “Lagjja e trimave”, 19 prej të cilëve janë shtetas kosovarë, ka reaguar edhe Kosova.

Kryeministri, Ramush Haradinaj, ka bërë thirrje për hetim ndërkombëtar,  duke kërkuar që drejtësia të vihet në vend, me zbardhjen e tërësishme të të gjithë rastit. “Kemi përcjellë me kujdes dhe vëmendje të shtuar procesin pas ngjarjeve tragjike në Kumanovë, në maj të vitit 2015 dhe dënimet e shqiptuara nga Gjykata në Shkup. Drejtësia duhet të vihet në vend, duke nisur që nga zbardhja e plotë e ngjarjes me të gjitha dimensionet e saj. Një hetim ndërkombëtar do të ndihmonte zbardhjen e plotë të së vërtetës, për të cilën mundohemi të gjithë”,- thuhet në deklaratën e Haradinajt.

Ndërkohë, ministri i Jashtëm i Kosovës, Behgjet Pacolli, ka thirrur në konsulta të brendshme ambasadorin e Kosovës në Shkup, Ylber Hysa, për të njëjtën çështje është thirrur për sqarim ambasadori i Republikës së Maqedonisë në Kosovë.