Marshi i Tolerancës “Shih me zemër, prano diversitetin”

Në shekullin XXI, këta persona vazhdojnë të mos kenë qasje të lirë deri tek institucionet, kanë barriera të shumta arkitektonike sa shkelin pragun e derës, shumë prej tyre jetojnë të ngulfatur në lartësi të pallateve pa ashensorë, nuk ka bankomate të specializuara për personat e verbër, fare pak prej tyre mendojnë se vendi i premton shumë për t’u punësuar në të ardhmen.

 

Ata u përpoqën të tërheqin vëmendjen përmes Marshit të Tolerancës të titulluar “Shih me zemër, prano diversitetin”. Prindërit dhe OJQ-të kërkojnë përkujdesje më të madhe institucionale.

 

“Për personat me aftësi të kufizuara, pengesa kryesore për inkluzion nëpër të gjitha sferat e shoqërisë janë barrierat arkitektike të cilat pengojnë qasjen e lirë deri tek institucionet”,- deklaroi Sonja Gjorgjievska nga “Mobilnost Makedonija”.

 

“Ne u bëjmë thirrje autoriteteve për zgjidhje sistematike të problemeve tona. Zgjidhje joafatshkurta por zgjidhje më afatgjate të cilat njëherë e përgjithmonë do t’i jepen fund problemeve tona që i kemi në përditshmëri”,- u shpreh prindi, Zoran Mijallkov.

 

Mungesa e qendrave ditore të përkujdesjes është problem më vete. Këta persona nuk kanë ku të ndjekin procesin edukativo-mësimor dhe të marrin ndihmën e nevojshme mjekësore gjatë ditës. 

 

“24 orë jemi lidhur me fëmijën që kemi në karrocë invalidore. Asaj i duhet përkujdesje maksimale shëndetësore, për këtë arsye pas 30 vjetëve në Shtip na u mundësua për herë të parë qëndrim ditor i saj  dhe jam i mendimit se qendra të tilla nevojitet të hapen nëpër të gjitha qytetet e vendit”,- theksoi prindi, Dimitar Sarpanov.

 

Marshi i Tolerancës u organizua në bashkëpunim me Komitetin e Helsinkit dhe i njëjti organizohet për të tetën herë në Shkup.