Sistemi “Tetra” në MPB, sistem bashkëkohor digjital për polici efikase

Policia ka sistem bashkëkohor dhe digjital të komunikimit të brendshëm. Sistemi “Tetra” zëvendësoi 99% të sistemit të vjetër analog të radiostacioneve të komunikimit të policisë, ndërsa zhvillimi i tij i mëtutjeshëm dhe përdorimi i tij profesional gjithmonë mund të kontribuojnë për të pasur polici më efikase në vend, tha numri një i policisë, Oliver Spasovski, gjatë vizitës së tij në Sektorin policor të Brendshëm në Shkup.

Spasovski dhe ambasadori i BE-së, Samuel Zhbogar, panë sot funksionimin e këtij sistemi në praktikë.

“Me ndihmën e BE-së na është mundësuar të kemi radio komunikim digjital të policisë dhe falë atyre është shkyçur sistemi analog i komunikimit të policisë dhe normalisht zhvillimi i këtij sistemi është gjithmonë i mirëseardhur”,- tha ministri i Brendshëm, Oliver Spasovski.

Reformat në polici janë ndër prioritetet kryesore të Bashkimit Europian për Maqedoninë. Për këtë arsye BE ka financuar tërësisht implementimin e sistemit “Tetra”.

“BE në tre fazat e implementimit të sistemit digjital deri tani ka dhënë gjithsej 20 milion euro. Ne konsiderojmë se komunikimi i sigurt i policisë është thelb kryesor për të kryer me efikasitet detyrat e policisë”,- theksoi ambasadori i BE-së në Shkup, Samuel Zhbogar.

Deri tani, mbi 6000 mijë punonjës policorë e përdorin sistemin digjital të komunikimit. Sistemi “Tetra” në Maqedoni zbatohet prej vitit 2005 dhe i njëjti është implementuar në disa pjesë të ndihmës së shpejtë dhe të Brigadës së zjarrfikësve. (Rexhep Qamili, TVM2)